西班牙人觀察日記
-Calle Hongkones 西遊記
講起西班牙，可能好多人會諗起鬥牛、flamenco 諸如此類嘅文化產物，呢啲當然充滿文化價值， 但筆者今次想用另一個角度切入，睇下西班牙人對「生活」嘅理解。
如果話香港精神係「快靚正」，咁西班牙嘅就會係「歎慢板」。呢個唔帶貶義，只係作為一個住 慣香港嘅人，去到西班牙生活落自然有嘅感受。筆者住喺南部嘅格拉納達 (Granada)，一個樸素嘅 古典小鎮，當然都遊歷過大城市如馬德里、巴塞隆拿，但發現西班牙人都自帶一種「慢活」嘅氣 質，做任何嘢都不慌不忙，每日行程編排好疏落，有時無咩特別 plan 喺屋企 hea 下就係一日，基 本上所有嘢都係慢慢咁進行。
舉個生活化啲嘅例子，佢哋普遍嘅食晏時間係有 3 個鐘，由 2pm 5pm，而呢 3 個鐘係可以由前菜、主菜一路食到到甜品，最後仲會有個叫” la sobremesa”嘅飯後時 間，俾大家一路飲住咖啡一路傾計，中意嘅仲可以瞓個晏覺添。喺香港人嘅角度睇，食 1 個鐘飯 返去做嘢咪得，遊手好閒咁食 3 粒鐘做乜呢？但係諗深一層，其實佢哋嘅工作模式不嬲都唔需要 急、有本錢歎，又何必做餐死呢？
一個返工日數少、工時短嘅地方，除咗歎之外，仲可以隨時見下屋企人同朋友，得閒請吓人上屋 企玩，吹下水飲下酒，同身邊人關係自然維繫得好。對比香港人，有時約朋友都要放年假先見 到，喺屋企都冇時間坐低食餐飯，西班牙人生活嘅模式，的確喺香港人求之不得嘅。
所以先會見到，香港人好恨放假，一有長假就會去旅行，恨不得將全年返工嘅壓力都喺一場旅行 之中排解，因為平時冇呢個時間空間去消化沉澱。西班牙人大多冇呢個煩惱，因為佢哋嘅生活從 來唔缺時間空間去休息，有咩返工搞唔掂嘅，放工約幾個 friend 飲幾杯吐下苦水就乜事都冇，香 港人想 attain 到嘅 work life balance，嚟西班牙自然就會感受到。
住喺西班牙，除咗進修西班牙文，去勻啲旅遊景點，筆者都好鐘意觀察當地人嘅生活習慣，了解 佢哋對生活嘅睇法。以上講嘅無論你覺得佢哋係懶又好、慢活也好，其實都無對錯之分，只有角 度之別。西班牙人呢種生活方式嘅可貴之處在於，睇到佢哋喺生活之中對所重視嘅價值貫徹始 終，而呢點係筆者最想分享俾香港人嘅。
和我們聯繫
